Botohet Periodiku i dytë për vitin 2020, "Diaspora Shqiptare”, Analiza dhe Studime

Fondi Shqiptar i Zhvillimit të Diasporës realizoi botimin e Periodikut të dytë për vitin 2020, "Diaspora Shqiptare”, Analiza dhe Studime. Ai publikohet çdo gjashtë muaj. Periodiku i dytë për vitin 2020, "Diaspora Shqiptare” ka në përmbajtje studime, raporte, artikuj dhe opinione falë kontributit të studiuesve e shkencëtarëve shqiptarë në Diasporë dhe Shqipëri.

Në fokus të këtij Periodiku është Strategjia Kombëtare e Diasporës Shqiptare 2021 – 2025, e cila përcakton parimet e politikës shtetërore të Republikës së Shqipërisë për mbështetjen e komuniteteve shqiptare, të cilët jetojnë në vendet pritëse në mënyrë të ligjshme.

Një vjetori i Dhomës së Biznesit të Diasporës Shqiptare erdhi ndryshe!

Me rastin e një vjetorit të krijimit të Dhomës së Biznesit të Diasporës, më datë 18.11.2020 u mbajt ceremonia e përvjetorit ku morën pjesë mbi 120 të ftuar nga brenda dhe jashtë vendit të cilët e ndoqën ceremoninë online.

Duke bërë bilancin e një viti pune kryetari i Dhomës së Biznesit, z. Ardian Lekaj, në fjalën e tij është shprehur: “Filluam ditën e tërmetit, u mblodhëm të gjithë së bashku në zonat ku kishte rënë tërmeti. Pyetja më e madhe në ato momente ishte: Do vazhdojmë, do të bëjmë hapjen apo nuk do të vazhdojmë? Ne vendosëm të vazhdojmë të bëjmë hapjen, për arsye se jeta e re fillon mbi gërmadha. Dhe ditë për ditë nga pak, filluam të zgjerojmë networkun, dhe të krijojmë kontaktet tona. Tani jemi në fazën e mbledhjes së informacioneve, pas kësaj faze kemi filluar me aleanca, dhe pas aleancave fillojnë projektet konkrete.”

Rrjeti i Profesionistëve në Diasporë

Rrjeti i profesionistëve të Diasporës është një portal që synon të mbështesë e të nxisë zhvillimin e Shqipërisë duke ofruar një urë lidhëse për Diasporën, me qëllimin për të mbledhur dhe shkëmbyer informacione dhe përfshirjen e ekspertizës së anëtarëve të këtyre komuniteteve në të mirë të zhvillimit të vendit si dhe në drejtim të gjenerimit të ideve dhe nismave me përfitim të përbashkët për anëtarët e këtyre komuniteteve.

Fondi Shqiptar për Zhvillimin e Diasporës ju fton të bëheni anëtar i “Rrjetit të Profesionistëve Shqiptarë në Diasporë”, si profesionistë, biznese apo organizata. Kjo platformë kapërcen barrierat gjeografike, për t’u ofruar komunitetit të profesionistëve shqiptarë në Diasporë mundësi informimi, bashkëpunimi, punësimi dhe investimi me qëllim gjenerimin e ideve dhe nismave të përbashkëta.

Fondi Shqiptar për Zhvillimin e Diasporës Marrëveshje bashkëpunimi me Prointegra

Kjo marrëveshje u lidh në sajë të dëshirës së palëve për të bashkëpunuar për realizimin e projekteve që synojnë mbështetjen dhe nxitjen e zhvillimit socio-ekonomik e kulturor të shqiptarëve në Republikën e Shqipërisë, Republikën e Kosovës dhe jashtë tyre, me anë të shkëmbimit të njohurive dhe burimeve në funksion të interesit të ndërsjellë të palëve. “Jam shumë i kënaqur që kemi arritur të shprehim një formalizim, dhe një bashkëpunim institucional mes Prointegrës dhe Fondit Shqiptar për Zhvillimin e Diasporës”- u shpreh Osmani.

Ndërsa drejtorja Fondit shqiptar për Zhvillimin e Diasporës, znj. Majlinda Vogli, e vlerësoi gatishmërinë e bashkëpunimit dhe shfrytëzimin e resurseve të përbashkëta për krijimin dhe plotësimin e rrjetit të profesionistëve të Diasporës Shqiptare.

“SHKENCA ËSHTË E MREKULLUESHME” – SHQIPËRI

Fondi Shqiptar për Zhvillimin e Diasporës, si partner i Komisionit Evropian dhe Marie Curie Action në eventin “European Research & Innovation Days - Shkenca është e mrekullueshme”, do të përfaqësohet nga znj. Majlinda Vogli, në cilësinë e Drejtores Ekzekutive të Institucionit, me anë të fjalës së saj përshëndetëse. Aktiviteti vjetor, i cili vjen për herë të parë në Shqipëri më datë 23 shtator, do të përfshijë kërkues shkencorë shqiptarë që zhvillojnë veprimtaritë e tyre akademike. Eventi që ka si qëllim rritjen e ndërgjegjësimit të publikut ndaj shkencës dhe këtë vit do të vij në formatin webinar.

Ky event organizohet me iniciativën e kërkuesve shqiptarë brenda vendit dhe në diasporë, me mbështetjen e Departamentit për Zhvillim dhe Mirëqeverisje në Kryeministri, Delegacionin Evropian në Shqipëri, Agjencinë e Kërkimit Shkencor dhe Inovacionit, Fondi Shqiptar për Zhvillimin e Diasporës dhe “EU for Innovation”.

FSHZHD dhe Biblioteka Kombëtare marrëveshje për Digjitimin e Veprave Shqiptare

Fondi Shqiptar për Zhvillimin e Diasporës, Biblioteka Kombëtare e Shqipërisë dhe Ministri i Shtetit për Diasporën kanë firmosur një marrëveshje me qëllim bashkëpunimin për realizimin e aktiviteteve për zhvillimin dhe promovimin e kulturës kombëtare në komunitetet shqiptare jashtë vendit.

Kjo marrëveshje parashikon koordinimin e veprimtarisë së institucioneve duke i dhënë rëndësi të veçantë kërkimit, hulumtimit dhe studimit të mundësive për ruajtjen, përhapjen dhe promovimin e kulturës shqiptare në përgjithësi, si dhe gjuhës e letërsisë shqipe në veçanti. Në bazë të kësaj marrëveshjeje këto institucione do të bashkëpunojnë me njëra-tjetrën për zhvillimin dhe promovimin e platformës “Digjitalizimi i Veprave Shqiptare”, organizimin e veprimtarive të përbashkëta kulturore për gjuhën, letërsinë, kulturën dhe vlerat shqiptare në komunitetet shqiptare.

Këshilli i Ministrave miratoi Strategjinë Kombëtare të Diasporës Shqiptare dhe Planin e Veprimit 2021 – 2025.

Këshilli i Ministrave miratoi Strategjinë Kombëtare të Diasporës Shqiptare dhe Planin e Veprimit 2021 – 2025. Dokumenti i miratuar nxit zhvillimin e politikave shtetërore për përfshirjen dhe kontributin e komuniteteve shqiptare jashtë vendit dhe forcimin e marrëdhënieve të Shqipërisë me Diasporën shqiptare.

Kjo është Strategjia e dytë që qeveria shqiptare ka miratuar. Dy vite më parë, ajo miratoi Strategjinë Kombëtare të Diasporës 2018 – 2024 i cili ishte i pari dokument në llojin e vet. Zhvillimet dinamike sollën një aplikim më të shpejtë çka solli në nevojën për rishikimin dhe përditësimin e këtij dokumenti.

Publikohet Periodiku i parë per vitin 2020: “Periodik 1/2020 Diaspora Shqiptare”

Ky botim vjen si produkt i Fondit Shqiptar për Zhvillimin e Diasporës, i cili publikohet çdo gjashtë muaj. “Periodik 1/2020 Diaspora Shqiptare” përbëhet nga studime, raporte, artikuj dhe opionione, kryesisht falë kontributit të studiuesve e shkencëtarëve shqiptarë në Diasporë dhe Shqipëri. Tematika e përgjithshme e këtij Periodiku përmban raporte, analiza dhe studime, të cilat janë kryer nga institucione shqiptare dhe ndërkombëtare me veprimtari brenda dhe jashtë vendit me në fokus migracionin shqiptar ndër vite. Gjithashtu, Periodiku është i fokusuar në vepra akademike dhe shkencore me të njëjtën temë.

Analiza dhe Studime